政情：風假爭拗 陳家珮叫釐清外傭權益

陳家珮認為所謂「打風假」，其實係好多公司礙於打風而不能如常運作，僱員返唔到工作崗位。然而外傭姐姐嘅工作崗位就係僱主嘅屋企，因此仍需工作；但話說回來，僱主亦必須保障外傭姐姐嘅人身安全，既然外面風雨交加，超市、街市都暫停營業，又何必要外傭姐姐落街呢？好危險喎。

為免再有類似「打風假」嘅爭拗，陳家珮主張勞僱之間應該要有共識。之不過，目前嘅外傭合約不但沿用咗廿幾年，唔好話冇與時並進，仲出現咗一啲漏洞，導致佢不時收到有關外傭僱主嘅求助。佢又話外傭係好獨特嘅職業，需要24小時對住僱主，好似家人一樣，加上香港有數十萬家庭每一日嘅生活都係依賴外傭，因此更加有必要訂立一啲法例，釐清外傭姐姐應得嘅權益之餘，同時亦可保障僱主。