政情：議員好姊妹 麥美娟見面攬實

立法會秘書處尋日接獲兩宗確診個案，分別係議員吳傑莊同梁美芬嘅職員「中招」，而兩名議員同其他共事職員做咗快速測試，結果係冇染疫。秘書處話吳嘅確診職員最近返回中信大廈13樓嘅日期係7月15日，近日冇同吳傑莊接觸，而梁嘅染疫職員最近亦喺7月15日返回立法會綜合大樓，曾到過7樓同地下公共申訴辦事處會議室。嗰名職員當日曾經陪同梁同當值議員與申訴團體會晤，全程佩戴口罩，同佢共事嘅職員正在居家隔離。立法會累計確診個案為311宗。

梁美芬回覆查詢時話嗰名職員早前已經因為身體唔舒服，有一段時間冇返工。康復後喺上周五返工，點知翌日同住家人確診，到咗尋日個職員自己都確診。佢話自己唔屬於緊密接觸者，辦事處所有職員都已經接受快測，結果係冇染疫，但為咗安全考慮，辦公室嘅人全部都會家居隔離，本周三復工。

上晝情深攬完之後，下晝收通知職員確診，希望大家都身體健康。其實，尋日同場嘅仲有議員梁文廣，但麥見到佢就停一停，只係碰手臂打招呼啫。