政情：足球友誼波 議員錫身唔踢齋坐

話說按原先嘅安排，廿多位議員以「25A」嘅球隊名稱，約同仁足社踢一場足球友誼賽，然而近來單日確診人數逾千，為安全計惟有退出賽事。之不過，鄧家彪、邱達根、何俊賢、容海恩、陳家珮、林琳、陳穎欣、林振昇同林筱魯就改為穿上球衣到球場做塘邊鶴，一樣樂也融融。

至於球衣嘅號碼，通常都係自行挑選，譬如林琳揀13號，事關13號係佢嘅生日；何俊賢踢前鋒就揀9號；至於踢開後衞嘅林筱魯着17號又點解呢？原來佢尋日忘記帶自己嗰件4號球衣，惟有着後備球衣出場。講番佢哋隊波之所以叫「25A」，係由於立法會足球隊尚未組成，於是就以25 anniversary（回歸25周年）為隊名。