政情：怕政策胎死腹中 前廳會拒爆內容

梁君彥認為交流會係個好開始，可以加強議員同官員之間嘅溝通，有助議員互相啟發，為政府獻計「多咗幾個臭皮匠一齊思考，分分鐘勝過諸葛亮」，讓政策能真正惠及市民。梁唔擔心被認為「閉門造車」，指議員會向公眾分享會上討論嘅議題，但某啲未成熟嘅想法若貿然公布，將不利政策醞釀。又指交流會由提出到實行只係相隔一星期，反映新政府注重行政立法關係。

另外，新一屆政府重組行政架構，梁君彥指立法會議員經商討後保留現行嘅事務委員會，但委員會內討論嘅議題會有變動，議事規則事務委員會會研究有關安排。至於有聲音質疑，完善選舉制度下組成嘅新一屆立法會，審議法案速度太快。梁就回應指，唔係審議時間愈長愈好，形容以往拉布既浪費時間又無提出實質意見，現時做法係回復常態。佢又指，新議員起初唔熟悉議事規則，需要多加提醒，依家已經步入正軌。