政情：同青年做好友 麥美娟要細水長流

麥美娟由議員轉任官員至今半個月，喺不同嘅場合會見年輕人。佢話年輕人工作，必須透過聆聽以了解佢哋嘅睇法同需要，然而要修補關係，令年輕人同政府建立互信，短時間內難以奏效，指如果有「特效藥」的話，老早有人用咗啦。佢提到以往與青年議題相關嘅委員會，曾有委員反映議程空泛、流於表面，因此今屆會作出改動，委員將被視為合作夥伴，既可參與，又能夠主導部分活動，擔任主要角色，而今年年尾就會推第一個版本嘅青年發展藍圖，但佢強調並非最終版本，話藍圖內嘅倡議喺落實時，會因情況變化而不斷更新，畢竟青年人嘅世界，隔兩、3年就係一代。

過去曾擔任區議員長達廿多年嘅麥美娟，指改革地區行政嘅時間表相當緊迫，而當局正研究區議會日後嘅形式。至於會否重設委任議員，佢就重申，必須符合《基本法》列明「非政權性的區域組織」嘅定位，有效發揮諮詢作用，成員亦能掌握民情民意。佢又指自己29年前大學畢業僅3個月就成為區議員，全賴委任制度，認為即使由政府委任亦不代表「唔接地氣」。被問到如何與非建制派人士合作，佢就形容自己係友誼小姐，過往喺地區工作上一直都係以事論事，畢竟社會繼續撕裂對任何人都無好處。

有關政府構思成立18區「地區服務及關愛隊伍」，麥美娟話並非監察居民，而係希望透過恒常接觸市民，把握民情同了解地區情況，再向政府反映。至於政府有意規管虛假資訊，佢解釋話為免不確訊息影響政府施政，包括抗疫工作等，亦不希望有公職人員因為執行職務而受到侮辱，會待顧問提交報告後，再視乎本地情況處理，佢又話當局希望充分諮詢持份者，希望大家「唔好驚住先」。