政情：元朗站排熱廢氣沈豪傑呻好難頂

沈豪傑話上個月已經聯同十八鄉五和村代表，同港鐵代表視察上址嘅熱廢氣排放問題。佢話乘客喺元朗站要感到舒適，必須持續開動冷氣機，熱廢氣可以話無可避免；而港鐵方面就承諾將站內兩部大型冷氣機，停開其中一部，以作為臨時緩解措施，然而效果並不理想，路經朗和路元朗站J出口仍有大量熱廢氣撲面而來，因此有好多人寧願改由G出口往返家園。

佢話自己唔識機電工程，但鑑於熱空氣向上嘅常識，建議港鐵嘗試將排氣風葉嘅角度調校一下，避免吹向地面，相信此舉可將高溫略為紓減。佢強調過高嘅氣溫，對長者或長期病患者嘅健康都十分不利。