昔日東方政情：職訓局茶果嶺校舍 撥款獲大比數通過
立法會財務委員會尋日通過涉款4.593億元嘅職業訓練局九龍東（茶果嶺）新校舍發展計劃。雖則多位議員曾去信財委會，要求推翻之前工務小組委員會不建議財委會進一步討論嘅裁決，最終非但冇得討論，項目更在大比數議員贊成下獲得通過。
議員圖再議不果
上月24日，立法會工務小組委員會通過職業訓練局校舍發展施工前期工程項目。但有7名議員就相當不滿，當日喺會後發出聯合聲明，批評當局規劃差，指該處屬優質用地，可作其他發展用途；又將議程以「打包」嘅方式通過，要求財會重新審議有關項目。
尋日嘅會議上，雖則有議員要求推翻小組建議，希望重新討論該項目，但喺冇獲得會上過半數議員支持，無法重啟討論。至項目需要表決嘅時候，議員張欣宇要求記名表決，項目亦喺54票贊成、4票反對、5票棄權下予以通過。
部分議員認為，整個校舍項目存在根本性缺陷，批評方案冇得到諮詢組織同埋區內市民嘅支持，強調項目最終冇獲得喺財委會進一步討論嘅機會就批准通過，係香港嘅遺憾。
佢哋又批評職訓局嘅代表，單純藉住校園需要儲存相當數量供教學用途嘅化學品、同埋危險品為由，拒絕重新審視建築設計。又認為興建校舍設施耗時4年，但預料設施使用壽命得5年左右，咁樣對支出公帑嘅態度，絕對無法認同！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
