政情：不記名表決投棄權票慣例唔記錄楊永杰唱反調

人在做，天在看。即使係不記名表決，議員嘅取態都會有人知？立法會財務委員會尋日召開會議，會議16項議程當中14項都係毋須討論，並採取不記名、多數人舉手同意就可通過嘅簡單表決形式。然而期間議員楊永杰提出一項新嘅舉措，認為表決過程就算係不記名，都要對「棄權」嘅議員有所記錄喎，而佢所持嘅理由，就係會議過程有錄影。

「同意嘅請舉手」、「不同意嘅請舉手……我認為同意嘅佔多數，議案獲得通過。」尋日財委會表決頭7項議程，財委會主席陳健波（波哥）都係咁宣布。直到審議分別涉款7.798億元，喺九龍塘聯福道興建兩所特殊學校；以及涉款4.836億元，喺西貢安達臣道石礦場用地發展一所小學同埋一所幼稚園嘅議程，楊永杰就出聲話要投棄權票。

新增「棄權請舉手」程序

楊永杰話音剛落，議員林健鋒即刻提出規程問題，指既然採取不記名投票，就唔需要記錄議員嘅取態啦！波哥都話咁多年都冇出現呢種情況，否則每次都要數，唔知要搞幾耐。波哥又話，好多時眼見議員舉手，支持都超過99%嘅。不過楊永杰就唔係咁睇，指立法會有錄影，市民會睇到；議員梁美芬亦都附和，話有時市民見到屏幕上有議員投棄權，認同有記錄嘅需要。波哥聽取意見後，話本來唔會重新處理程序，但為免出現混亂，都係再舉手表決一次，不過就增加「棄權請舉手」嘅程序，而新嘅做法亦包括餘下毋須討論嘅議程。

直到審議改善公營小學中層管理人手項目嘅時候，議員謝偉銓舉手棄權，波哥隨即揚聲確認謝棄權，然而此舉恰恰違背不記名表決嘅做法！

會後波哥話，已經叫秘書處同埋法律顧問考慮議員嘅意見，睇吓不記名投票係咪有棄權選項。佢又話，議員如果想投棄權票，其實可以要求記名表決嘅。