要聞港聞

笑看天下:勞工處唔該快手啲

兩年多嘅疫情,令百業蕭條,吉舖處處。早前有連鎖食肆母公司亞太餐飲突然倒閉,負責人下落不明,繼續拖欠員工薪金。事實上,唔少基層手停口停,即使有些微積蓄,如果連續多月冇工返,亦頂唔到幾耐。
呢,日前立法會政府帳目委員會發表報告,指部分破產欠薪基金申請由接獲要求至發放款項,需時逾年,比率更大幅上升。帳委會主席批評勞工處歎慢板,對此極度關注和不滿。有議員表示,破欠基金特惠款項猶如打工仔救命錢,惟要等數月甚至超過一年才取得有關款項,極度不理想。
各位,申破欠拖一年,絕對唔理想!勞工處變成「飽漢」,梗係唔知「餓漢飢」喇!老朽看過一副對聯:「得一官不榮,失一官不辱,勿道一官無用,地方全靠一官;穿百姓之衣,吃百姓之飯,莫以百姓可欺,自己也是百姓。」做官的,如果可以反省深思「自己也是百姓」,不忘初心,就會體察民瘼所在、民憂所繫,那就不會處事官僚,甚至口惠而實不至!申破欠拖一年,對基層絕對不是小事,係大事,甚至係急事!
阿哥,係等錢開飯,唔係等錢去旅遊呀!市道差,鬼叫你窮吖,頂硬上啦!霎時你「為兩餐乜都肯制前世」都未必搵到工。是以對於破欠基金特惠款嘅申領,一個字就係要「快」!所謂「幹在實處,走在前列」是也。議員建議處方研究有效措施,避免程序拖延,包括盡早提供法律服務,協助僱員向僱主提出破產或清盤呈請。之不過,若僱主走咗佬,政府係唔係應該提供即時貸款或援助呢?以前做地方官嘅小吏,都能「但願蒼生俱飽暖,不辭辛苦出山林」;依家做官嘅,當明「百種弊病,皆從懶生」,一處遲則百處懈也,勞工處唔該快手啲!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500