政情：交流會冇發問過管浩鳴全程齋坐

話明係「交流」，當然係要有傾有講，有問有答啦。議員管浩鳴（管牧）尋日出席立法會首次前廳交流會，事後就慨嘆話全程齋坐，冇機會同司長對談喎。話說管牧分組同律政司司長林定國「交流」，而該組就得4個議員。管牧本來打算同司長討論有關地契嘅問題，以為得4個議員今次實問到啦，點知同組嘅議員陳曼琪太多問題捉住司長傾。管牧話明白陳具法律界背景，自然會趁機詢問多項有關法律嘅議題，希望下次有機會再發問啦。

雖然好多議員都把握機會出席首次前廳交流會，但議員郭偉强就冇出席喎，莫非冇嘢想交流？梗係唔係啦，只不過咁啱尋日有公務員及資助機構員工事務委員會特別會議，郭作為主席根本就行唔開。但即使無暇赴會，佢都提早15分鐘落去影張相「打卡」，認為錯過第一次唔緊要，以後仲有大把機會。

議員即場畫畫滿足網民好奇心

儘管前廳交流會不設傳媒拍攝同直播，但議員何君堯就即場揮筆繪畫交流會眾生相並上載社交平台。此舉雖可滿足網民嘅好奇心，但若欠缺人名標記的話，究竟畫中眾人「邊個打邊個」，恐怕有排估喇。