政情：立會餐廳歎茶 林健鋒食嘢唔知價

所謂「下午茶召集人」，原來就係前議員張華峰（肥老闆）。議員林健鋒（Jeffrey）指過去每逢下午茶時間，肥老闆就會召集黨友，嗌定晒唔同嘢食擺喺枱面，等大家可以一邊食一邊腦震盪。雖然肥老闆尋日有事而嚟唔到，但Jeffrey話對飲食有要求嘅肥老闆，曾經向餐廳「反映意見」，將薄切豬扒變做為厚切豬扒，而佢當日嘅「成功爭取」，今日大家仍然津津樂道。

至於「林健鋒三文治」又係乜東東呢？其實係Jeffrey最喜歡食嘅「鮮牛蛋治烘底」。之不過，由於鮮牛肉食材較貴，故餐單上冇列出嚟，但到底賣幾多錢一客？Jeffrey笑言，直到依家都唔知價錢咁話。議員盧偉國，就話自己點得最多嘅係「B餐」，其組合係沙嗲牛肉麵加餐肉煎蛋，但麵包要改「占多」，而飲得最多嘅係「茶走少甜」。「新丁」陳祖恒加入立法會約半年時間，佢喺呢間餐廳最常食嘅，都係沙嗲牛肉麵。