政情：做局長唔夠兩周麥美娟官腔琅琅上口

前同事唔畀面直斥一味「聽意見」

民政及青年事務局局長麥美娟，過去擔任議員即使「牙尖嘴利」，但尋日喺出席立法會大會接受口頭質詢，都畀議員質問到支吾以對。事緣法律界議員林新強喺會上，就政府部門點樣與社會組織協作嘅問題而提出質詢，然而麥美娟恍如人肉錄音機嘅回應，就惹來議員嘅不滿，批評佢即使不斷咁重複指「政府會聽取意見」，其實係依然故我、我行我素。另有議員斥社會組織與官員間溝通好困難，形容係「倒瀉籮蟹」。

麥美娟轉跑道踏足官場雖不足兩周，但係官腔回應就頗為到家。當林新強詢間當局，各政府部門會如何與各社會組織協作，共同推動落實，以達到「以結果為目標」嘅施政理念？麥嘅回應雖然長達8分鐘，但係內容來來去去，都不外乎話會透過社會組織，包括青年發展委員會，與持份者保持緊密聯繫，仲會定期舉辦地區福利服務規劃研討會，廣納唔同界別對社區福利需要嘅意見，以規劃社福策略，諸如此類。

林新強聽完麥美娟嘅回應，望落面有慍色，直斥政府過往都只係聽取意見，不停諮詢、再諮詢，同埋搞吓講座咁，以為做咗好多事，但其實一啲都唔「落地」，基本上冇同其他社會組織一齊落實政策。林批評政府唔應該聽完、講完就算數。林又希望政府切莫「意見接受，態度照舊」。林又追問麥，究竟邊一個組織會負責研究及推行，有關政府與社區組織嘅協作及改革？結果麥答唔到，只係話以往都有同社會組織合作落實措施，例如青年內地實習資助計劃等等，叫議員放心。

未協調社會組織防疫倒瀉籮蟹

議員狄志遠發言指，佢接觸過嘅社會團體都表示，同官員嘅溝通或參與真係好困難，希望政府會喺各個諮詢委員會，劃定比例供社會組織參與。麥回覆話委員會本身，就有業外人士嘅參與嘅，話會考慮狄嘅意見，令委員會更有代表性。

議員林筱魯亦不滿政府喺推動社會組織去協助落實防疫抗疫政策方面，係「倒瀉籮蟹」！原因在於各政府部門並唔掌握每個社會組織嘅功能，以及之間嘅調配或協調。麥就話會總結經驗，將來又會成立，現任特首政綱中曾提及嘅全港18區「地區服務及關愛隊伍」義工網絡，以支援地區工作。