政情：顏汶羽試做食環外判工 大嘆器材重

其實顏汶羽係應團體嘅邀請，出席抗貧體驗活動，而佢就喺眾多嘅基層「體驗」項目中，揀選防治蟲鼠組外判員工嘅日常工作。顏汶羽形容佢孭住嘅噴灑器材，就好似一包5公斤米咁重，若然注滿殺蟲藥水，重量肯定倍增。儘管打呢份工相當費力且收入微薄，但佢聽聞有啲個案，話外判員工趁住同事幫佢補充殺蟲藥水嘅機會，卸下噴灑器材然後坐低休息，誰知遭到食環署職員指摘，話佢偷懶。

顏汶羽話體驗過基層嘅辛酸，更感滅貧工作之迫切，但佢質疑政府設立貧窮線後一直以全港性扶貧為主嘅策略，認為地區性扶貧，及以個案形式解決持續貧窮，先至係對症下藥之舉。佢又建議政府為滅貧設立KPI（關鍵績效指標），訂立5年內貧窮率會跌幾多嘅目標，方可紓緩貧窮問題。