昔日東方政情：唔怕陳紹雄確診 何俊賢：有抗體護身
立會坐隔籬冇得避
疫情反覆，確診個案仍然徘徊喺逾2,700宗，立法會亦唔例外，選委會界別議員陳紹雄尋日快測確診。翻查紀錄，陳紹雄前日分別出席立法會環境事務委員會會議同發展智慧城市事宜小組委員會會議，坐喺佢側邊嘅議員郭偉强同何俊賢（高佬賢）都話唔怕，高佬賢仲話佢有抗體添！
陳紹雄話已透過政府網站通報相關部門，立即進行自我居家隔離。目前身體出現輕微感冒徵狀，打算服用連花清瘟膠囊，並監察身體情況變化。佢又話過去一個禮拜，每日快測都係冇染疫。前日下晝喺立法會大樓506室同數名官員及議員同事開會，同日喺會議室3出席兩個會議。佢希望盡快康復，繼續為社會及業界服務。
話說紡織及製衣界議員陳祖恒喺6月初確診後，喺會議廳坐喺佢隔籬嘅議員劉業強已主動自我隔離，點知一個禮拜後就宣布確診。雖則未能確定係咪畀陳祖恒傳染，但可能性不容排除。前車可鑑，所以開會坐喺陳紹雄隔籬嘅議員都好高危。
回帶睇過前日下晝召開嘅環境事務委員會會議，在坐嘅議員全部都有戴口罩，當然包括陳紹雄，佢亦有發言，而坐喺陳後排嘅係陳月明，陳月明右邊就係劉業強。喺會議開波嘅時候，坐喺佢左邊隔一個位嘅係郭偉强，郭發言之後無幾耐就離開會議室，接住就見到漁農界嘅高佬賢坐咗喺陳嘅隔籬。
郭偉强指唔覺陳有異樣
咦！高佬賢早前都中招，前日係康復後首日返立法會。尋日問佢啱啱好番又遇到陳紹雄確診，係咪好黑仔？佢話唔黑仔，仲話理論上佢有抗體，兼且日日都做測試，尋日都冇問題。佢仲話前日開會唔覺得陳紹雄有乜嘢唔妥，所以市民要留意，要自行做多啲檢測，事關陳紹雄都係自行做檢測時得知染疫嘅，唔好以為做快測冇用。
郭偉强就話尋日都做咗快測先返立法會，仲主持咗研究與都市固體廢物收費、回收及循環再造相關的政策事宜小組委員會會議。佢話前日唔單止喺會上發言，亦有同陳紹雄就一啲議題交換過意見，期間雙方都有戴口罩，形容陳當時精神唔錯，冇異樣。至於坐喺陳紹雄前排右邊位嘅陳學鋒，日日都有做快測，依家身體冇問題，一切正常，自己盡量喺議事廳唔除口罩。
當然唔希望疫情散播喇，希望佢哋都冇事。其實，之前亦有多名議員先後確診，包括會計界黃俊碩，時任議員麥美娟、梁文廣、劉智鵬、陳祖恒同嚴剛。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
