政情：被問續掌選管會與否 馮驊封口

佢話根據有關規例，選管會主席要由現任高等法院法官出任，由特首經諮詢終審法院首席法官後委任，佢就唔評論任期事宜。被問到點樣形容自己過往嘅感受，佢亦笑住話可以睇番咁多本選舉活動指引嘅引言，同埋選舉報告嘅建議，因為都係佢本人寫嘅，就會知道晒佢有咩講喎。

其實喺擔任選管會主席期間，佢屢受批評。例如2019年區議會選舉曾出現唔少重複排隊嘅情況，令唔少長者、孕婦等有需要人士因輪候時間過長不適而放棄投票。有政黨要求喺2020年立法會選舉中設立「關愛隊」，畀有需要人士優先投票，但遭拒絕，唔少議員都炮轟佢不思進取，批評佢拒絕所有改善建議而又無合理解釋，認為完全不可接受，終於喺舊年嘅換屆選舉，先設立關愛隊。

喺2021年選委會選舉點票時間花咗14小時，時任議員、現任民政及青年事務局局長麥美娟直斥馮驊有關點票工作太慢，令候選人在場白等，而馮最後對選委會選舉點票時間遠超預期感抱歉，承認運送票箱及點票過程不理想，就點票方面有需要詳細檢討。