昔日東方政情：前廳交流會明啟動 「25分鐘唔夠用」
特首李家超早前喺立法會答問會提出，每個月由司長或副司長帶領5至6名局長，到立法會舉行「前廳交流會」，同議員討論唔同政策範疇。李家超將率領司長、副司長同特首辦主任，聽日同議員舉行首場「前廳交流會」，並依唔同界別嘅議員分為3個時段。之不過，有議員就話25分鐘唔夠用，每人「講句早晨你好都冇咗」；亦有議員認為日後可按部就班增加討論時間。
交流會分為3個時段進行，每時段25分鐘，首節由9時30分開始，供地區直選議員同選委界中嘅葛珮帆小組10名成員參加；第二節10時開始，對象係功能界別議員；最後一節10時30分開始，集中喺選委界議員。
「每人講句早晨你好都冇咗」
港島東地區直選議員梁熙相信「前廳交流會」有助拉近議員同官員之間嘅距離感。至於喺時限上，佢話未來應按部就班，相信日後可以增加時間，因為以地區直選議員為例，都有成20名議員，時間太短嘅話，議員會「唔夠時間講嘢」，或可延長至一小時等，佢都會聚焦喺地區議題發言。
社福界議員狄志遠就話只有25分鐘交流唔太理想，以功能界別30名議員為例，每人若平均分配時間僅得約一分鐘，「講句早晨你好都冇咗」，但佢強調「啟動咗先」，並從中取得經驗，透過呢類交流會形成一種文化，令行政、立法有良好溝通。佢亦建議日後立法會大會召開前，官員當日可以撥出15分鐘時間同議員交流有關質詢嘅項目。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
