政情：到站時間唔準使用率低運署出行易APP捱批

香港人生活忙碌，無論揸車、泊車同等車，掌握最新資訊係生活中嘅頭等大事。運輸署上年3月推出手機應用程式「香港出行易」全新版，讓市民掌握交通資訊。早前有議員追問過全新版嘅滿意度、下載數字同點擊率係咪符合部門預期同預期使用人數，但係政府並冇回應呢啲問題。尋日立法會智慧城市事宜小組委員會開會，而呢個軟件就被一眾議員轟使用率低、行車時間唔準、版面設計唔友好，直指軟件評分只有2分，兼且「蝦人用」！

吳永嘉：版面設計唔友好

議員吳永嘉話「出行易」下載量雖達260萬，但每日點擊率只有5萬，換言之，每日只有2%用戶使用，再加上行車到站時間唔準確、版面設計唔友好，建議當局加設留言板收集意見。但係政府官員就唔多認同，運輸署副署長邱國鼎就話，啲數字唔可以咁睇嘅，點擊率係其中一個重要指標，但唔係直接成正比，而且有時點擊率都會去到10萬咁多㗎，例如有塞車或者交通意外時，至於留言板就唔會加。

邱達根：免責聲明太複雜

隔咗一陣，科技創新界議員邱達根就直斥「出行易」嚇怕人，啱啱下載完軟件之後，就有30條免責聲明，試問一個律師都未必睇得明，撳路旁泊位功能仲要連接去另一個軟件「入錶易」，功能形同虛設，直情係「唔方便」，評分得2分係中肯咁話。

邱達根又鬧爆單車徑功能係「蝦人用」，仲話「睇得明都踩完單車」。佢仲話商場即使唔同「出行易」共享停車場實時數據，但「出行易」係咪可以連結商場嘅軟件，令市民知道可以去邊度搵所需資訊。見到議員係咁發炮，邱國鼎淨係答咗兩句，軟件最大優點係可以更新，議員提嘅意見會全盤考慮。

話時話，「出行易」全新版推出以嚟已經更新咗34次，對上4個星期仲要差唔多一星期更新一次，但大家都係彈多過讚，睇嚟運輸署要再努力啲嘞！