政情：政黨黨慶教整花生糖 搵埋陳茂波

話說每年黨慶都會有短片分享環節，今年就由議員容海恩、陳家珮，聯同財政司司長陳茂波對住鏡頭整花生糖。一開頭，容海恩話素聞陳茂波好識煮嘢食，但陳就話自己最叻係整餅喎，到底佢係指做大經濟個餅，定還是自嘲阿茂整餅呢？咁就不得而知喇！去到製作示範嘅環節，只見佢哋先將片糖加水煮融、然後再加花生，咁就大功告成嘞，可以話無咩難度。

示範期間，陳家珮講到自己做議員嘅感受，指日常相當忙碌，好多文件需要閱讀。跟住佢又話，花生糖係有史以來第一種糖果，其歷史可追溯到戰國時期，難民以麥芽糖拌花生，方便走難途中用嚟果腹喎。之不過，現時嘅「花生」係明朝由美洲傳入，到底陳家珮所講嘅花生糖歷史係根據咩典籍呢？佢就無交代喇。