昔日東方政情：議辦又見孖頭 聽民意冇得抖
地區直選 選委界別 相繼聯手
今屆立法會跨界別議員要「孖頭」開地區辦事處，「熱潮」至今持續。喺尋日，就有4位議員嘅聯合地區辦事處開幕，包括新界北議員張欣宇與選委界議員譚岳衡位於粉嶺祥華邨嘅地辦，以及九龍東議員鄧家彪與選委界議員江玉歡位於觀塘翠屏邨嘅議辦，並獲多名新官捧場。兩者都係地區直選議員與選委界別議員合作，希望更整全地服務市民。其中張欣宇及譚岳衡就提到，選址粉嶺係因為鄰近北部都會區嘅中心地帶，日後有好多發展機會，亦有助佢哋「落地」聽民意。
張欣宇表示，希望利用佢同譚嘅優勢，為北部都會區帶來更多發展機會和金融機遇。而辦事處會提供多種服務，包括法律諮詢、金融知識同就業創業分享等，亦會舉辦工作坊、漂書等活動，冀能夠促進與市民之間嘅互動。至於譚岳衡就話為貼近社區，聽取市民意見，特意喺粉嶺開設地辦，因該處係北部都會區嘅中心，亦係發展港深「雙地三圈」及「粵港澳大灣區」嘅重要地帶。
多名新官捧場 承諾落區
而開幕禮亦邀得前選委界議員、創新科技及工業局局長孫東同財經事務及庫務局局長許正宇到場主禮。許發言時，形容開幕禮符合「天時地利人和」，而地辦環境感覺令人輕鬆親切，日後必定「客似雲來」。孫東就承諾日後會經常到訪地辦聽民意喎！
另一邊廂，鄧家彪與江玉歡喺觀塘翠屏邨嘅聯合地辦亦喺尋日開幕，期間勞工及福利局局長孫玉菡到場祝賀。被問到作為選委界議員為何與地區直選嘅鄧家彪組合開議辦，江玉歡表示相對地區直選議員，選委界議員較難接觸市民，佢想衝出呢個障礙，認為自己作為選委界議員更應「落地」，加上觀塘有唔少基層問題，故欣然接受鄧家彪嘅邀請。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
