政情：疫下外遊準備 姚柏良教睇吓護照過期未

講完旅遊證件，姚柏良就話務必了解目的地嘅入境條件或防疫要求，譬如旅客現時進入日本只能參加旅行團，但泰國就無呢個限制，而有關資訊可以上網、或查詢航空公司了解。由於疫情未止，若不幸喺外地中招而需住院隔離，牽涉嘅費用可能相當可觀，所以旅遊保險係唔慳得，仲有就係好多人出門都會帶備一啲成藥，但好多國家對於成藥所含嘅成分係有其規限，特別係中成藥，唔想有手尾跟，最穩陣當然係入境嘅時候作出申報。

返港又點呢？姚話上飛機之前需要有48小時內嘅核酸測試證明，同埋手上要有入住隔離酒店嘅確認信。佢話香港嘅隔離酒店，房源頗為緊張，因此應須盡早做好準備。至於炒賣隔離酒店房間嘅傳聞，佢認為唔會發生，因為參與計劃嘅隔離酒店，需維持當初收取嘅房價，唔可以加收。但佢就唔排除有中介提供訂房連機票一條龍服務，從而收取額外費用嘅現象。

作為業界代表，佢當然係希望香港可以盡快通關，畢竟成個旅遊業都喺度捱緊、陷於垂危狀態。再加上佢都有兩年多，無法探望身在廣州嘅母親嘞！