政情：獲委廉政專員感光榮 期望創高峰 胡英明誓保香港廉潔

胡英明話，好榮幸獲得國家及港府信任，委任成為廉政專員，佢會堅守「永遠無最好，只有更好」理念，有信心帶領廉署未來5年創高峰。佢雖然喺懲教署工作咗咁耐，但認為轉做廉政工作唔難適應，又話好鍾意接受挑戰。2004年佢喺懲教署保安組工作時，同廉署攜手調查一宗人員受賄案，最終揭發人員收錢為在囚人士帶「藍精靈」入監獄，成功揪出壞分子。

佢估計未來5年挑戰都幾大，因為本港迎來「由治及興」嘅關鍵時刻，預期社會急速發展，「如果處理得唔好，會有好多漏洞畀不法之徒進行貪污活動」，所以未來會做好執法、防貪同教育3方面嘅工作，亦要預防不法分子利用貪污途徑危害國安。佢都有心理準備將來廉署會受外部勢力抹黑，佢強調「唔驚抹黑」，廉署作為一個獨立嘅執法部門，只要公平公正處理案件，就唔會受影響。

胡英明一上任已經同執行處、防止貪污處、社區關係處、國際合作及機構事務處4個部門處長商討工作。問到會唔會好似以往發展智慧監獄咁，考慮將科技帶入廉署，佢就話呢個正正就係佢同部門處長見面嘅其中一個議題，話大家都有共識將來運用更多科技。