昔日東方政情：撤回議案想避嫌？ 葉劉：時間度唔掂
任行會召集人 原擬立會傾改革政府宣傳
議員葉劉淑儀出任新一屆政府行政會議召集人，而作為政府智囊團嘅行會成員，主要向政府提出意見並設定具體施政方向，並避免公開批評，以免政府威信受損。葉劉早前就「改革政府宣傳策略」提出無效力議員議案，原定下周三（13日）大會展開辯論，但尋日佢就突然撤回有關議案。
立法會下周三召開嘅大會，為立會放暑假前嘅最後一次會議，而原定當日有兩個議員議案，包括葉劉動議嘅「改革政府宣傳策略」議案，同謝偉銓動議嘅「加快實踐，健康城市目標」議案。但根據立法會最新文件顯示，葉劉已撤回其編訂嘅議案預告。意味住屆時只審議一條議員議案。
議員議案需抽籤 機會難得
突然撤回改革政府宣傳策略嘅議案，莫非係避嫌，唔想新政府剛上場之時，就與當局打對台，批評政府宣傳策略做得差？葉劉就話並非如此，只係時間上有衝突，解釋該日有要事，無法出席長達幾個鐘嘅議員議案。加上口頭質詢先可以搵其他議員代為發問，但議員議案就唔得，惟有撤回。
由於提出議員議案需要抽籤，會否覺得浪費咗一次難得嘅機會？葉劉就話唔會嘅，之後再抽過。至於下次會否再提出相關議案？佢就話自己向來都關心政府宣傳策略呢個議題。但睇番暑假後復會嘅會議，就有11位議員打算提出議員議案，最終只有兩人可以中籤，當中更有4位議員前後抽咗5次都未抽中呀！
葉劉過去多次公開批評政府宣傳策略，如政府新聞處宣傳手法過時，運作模式追唔上時代、新聞稿複雜冗長，市民難以消化當中嘅訊息，認為需要改革。早前佢更質疑時任新聞統籌專員馮煒光，任內好似無做過啲咩。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
