政情：議員鬧領展多問題 叫何永賢落區睇睇

議員黎棟國尋日喺立法會大會上，質詢有幾多宗因房屋委員會無管控權、由第三者擁有、但無適時維修或遭放棄嘅公共屋邨、及資助房屋屋邨康樂設施嘅個案，以及政府於推動相關商業設施嘅成效及缺失。房屋局局長何永賢回應話，房委會分拆出售嘅180項物業中，該房託基金擁有123項物業，另外56個物業已經轉售。何又指出，拆售物業嘅業主都要受法例、地契條款等規範，只要符合規定同地契條文，政府及房委會無權干涉其商業決定。

議員鄧家彪批評，該房託基金累積嘅問題未有解決，必須盡快處理呢個「燙手山芋」。鄧形容該房託基金當日上市時，公屋及居屋居民都「被賣豬仔」。鄧又以該房託基金管理嘅觀塘某屋苑為例，指長年欠缺維修，亦拒絕向居民借出空間舉辦活動，但就要業主支付七成工程費用，並質問局長會否一齊落區視察。何話手上並無該屋苑資料，會後定會跟進個案，又話設施建設得好，對各方面都是雙贏。