政情：陳祖恒唔做獨行俠 經民聯歡迎加入

既然過去只係保持合作關係，而無正式加入，到底Sunny加入經民聯嘅契機係乜呢？佢話上任至今半年，覺得一個人喺議會單打獨鬥冇咁好，畢竟一個人嘅力量始終有限。而近日新一屆政府展開，佢認為係好嘅時間及契機，加入同自己理念一致嘅經民聯，希望議會工作可以發揮得更好。佢仲話喺過去6個月嘅議會生涯中，感受到經民聯嘅支持，而喺第5波疫情期間，曾與經民聯合作向政府爭取紓緩措施，並取得成果，認為同經民聯嘅理念一致，期待更多合作，令工作更加順利。

經民聯主席盧偉國、副主席林健鋒歡迎陳祖恒加入。林笑言，經民聯嘅議員愈搵愈靚仔，話自己同Sunny認識咗好耐，又話對方涉獵好多範圍，工作理念相似，所以大家走埋一齊，但就無話邊個招手先。至於經民聯日後會唔會再擴大版圖，林就話立法會內有唔少志同道合嘅朋友，大家有傾有講。今屆立法會第二大黨原本係工聯會，但隨住麥美娟加入政府出任民政及青年事務局局長後，議席減至7席，而本身有7席嘅經民聯，就因Sunny加盟而增至8席，成為立法會第二大政黨。

由於Sunny上個月被政府委任為生產力促進局主席，佢尋日辭咗立法會工商事務委員會副主席嘅職務。佢話暫時並無接替嘅人選，而立法會亦即將休會，短時間內都唔會召開工商事務委員會，應該遲啲先會選。

議會內有多個政黨，亦有多個聯盟，例如由上屆嘅G6，今屆就膨脹成G19，早前有由4名地區直選但無政黨背景嘅議員組成A4，甚至日前話喺中信大廈辦公嘅議員起朵做C15+，呢啲都係趨勢嚟。

實際上，自從立法會修改《議事規則》後，事務委員會同法案委員會嘅人數都有限制，係要用名單制分配名額嘅，單頭議員唔埋堆就比較「蝕底」，依家只係剩低狄志遠同田北辰冇加入任何名單。