政情：懸空半年 邊個做副主席？ 大埔區會仍無共識

大埔區議員姚鈞豪早前宣誓後被取消區議員資格（DQ），現時大埔區議會7位在任議員當中仍有5名民主派，佔議會大多數，包括主席毛家俊、劉勇威、何偉霖、譚爾培同區鎮濠，另兩名建制派為林奕權同李耀斌。但喺1月4日、5月3日同尋日嘅區議會大會會議，都未能選出副主席。對於已3次流會，毛家俊話影響不大，基本民生嘢都繼續做緊，只係開唔到大會。

前副主席劉勇威就話尋日朝早接獲秘書處通知再度流會，仲話依家佢都冇任何諗法。劉勇威喺今年1月1日離任副主席，話今屆區議會成立之初因曾與同事協商，要喺出任兩年後「退位」由其他人輪任，畀更多人有主持議會嘅經驗。根據《區議會條例》，若區議員有意競選副主席，必須取得一名區議員動議、兩名區議員和議，方能進入競選程序。