政情：政府唔泵水電車財困難除

話說喺立法會有關《2022年電車條例（修訂車費）（修訂）公告》小組委員會會議上，運輸及物流局副秘書長（運輸）黃珮玟都話電車公司評估咗，加價之後客量會下降3%，仲話疫情平穩、旅客回流之後，乘客量就會回復正常。

依家疫情咁反覆，點知幾時先會回復乘客量？唔單止咁，再加上電車網絡嘅運行技術獨特，識得揸電車同埋維修保養嘅人少之又少。雖然6年嚟車長嘅人工按年增加3.5%，但其實都係1.4萬元至1.8萬元不等。議員陸頌雄就話如果唔係鍾意電車都唔會做車長，因為人工對比其他交通工具嘅車長真係低，又要求政府為長者提供免費搭電車；另一議員陳紹雄直接問政府點樣吸納同挽留人才，政府有冇補助啲車長？黃珮玟直認呢樣嘢係電車公司「頭痛」嘅事，但係要點樣補助就要再考慮。

補助又話要考慮，有議員擔心加價救得一時，救唔到一世，驚兩至3年後電車就出現危機，係咪又要再加價？問政府係咪可以幫吓？議員郭偉强就質問係咪因為電車公司係私人企業，所以補助唔多，天星小輪都免咗牌照費，點解電車冇？

唔少議員仲獻計，以增加電車公司嘅收入。議員陳學鋒話當局有冇同電車公司商量，建議將電車廠加建部分樓層成商場等公共設施，吸引多啲人流參觀，減輕電車公司嘅財政壓力。另一議員容海恩亦建議將新舊元素互相配合，包括新型嘅設計，令旅客有新鮮感。至於議員李鎮強就提議擺放印有明星海報嘅電車，向市民收取門票，令佢哋可以企定定同架電車影相。

之但係，黃珮玟只係回應話政府有喺其他方面幫助電車公司，例如協助更換路軌。但班議員幫佢諗嘅計仔，佢就全部都話考慮吓先。唔知政府要考慮幾耐呢？