昔日東方政情：姚鈞豪失議員職 大埔區會有望選出副主席
今年年初，大埔區議會因副主席花落誰家嘅問題而掀起一場風波。事緣時任副主席嘅劉勇威喺被「催促」下，履行「兩年一屆」協議，辭任副主席。儘管大埔區議會仲係泛民佔多數，但喺1月同5月嘅大會，均收唔到候選人提名而流會，以致副主席一職懸空至今，連帶大會亦陷於停擺，積壓大量民生議題。之不過，隨住言論向來「惹火」嘅前任區議員姚鈞豪，上月遭取消區議員資格（DQ）後，泛民主派之間嘅衝突似乎有緩和嘅轉機，但能否於本周二順利選出副主席，事情仍有變數。
根據《區議會條例》，每次區議會大會，必須正、副主席均在場嘅情況下，方可舉行；選舉方面，亦規定要有3名不同議員提名及附議，先可進入競選程序。經過去年嘅辭職潮，今年年初大埔區議會嘅在任區議員有8人，當中6人屬泛民主派，補選副主席應該冇難度。然而泛民主派之間不但無嘗試協調，甚至視對方為陌路人。即使區鎮濠已公開表示有意競逐副主席，但礙於姚鈞豪及何偉霖並唔支持，加上譚爾培立場搖擺不定，令區鎮濠苦差一票，就算獲得主席毛家俊同劉勇威嘅支持亦於事無補。
區鎮濠差一票可當選
但隨住「同路人」姚鈞豪嘅離開，或者令到泛民主派願意暫時放低分歧，從而化解呢場糾纏咗半年嘅僵局。至於劉勇威回覆查詢時表示，自己好早就支持有意參選嘅區鎮濠，但時至今日因為有人唔肯畀嗰一票，導致選唔到副主席。開唔到大會嘅話，就要問番「相關人士」，事關呢個係某啲人嘅責任。
但有消息指，其實何偉霖同譚爾培嘅立場相當「堅定」，況且亦無協商嘅意欲。就連相關政府部門都覺得奇怪，由泛民主派主導嘅大埔區議會，延宕至今仍未選出副主席，唔明當中有何內情。翻查大埔區議會網頁，區議會大會將於本周二早上9時30分舉行，並留有30分鐘作副主席選舉。當日能否選出副主席，就要睇呢班泛民主派議員嘅造化喇！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
