政情：難得聚首政商盛裝悉心揀服飾配搭夠搶眼

受到疫情影響，公開活動少之又少，唔少政商界人士尋日趁住出席7‧1活動爭相「集郵」。大多數嘉賓都盛裝赴會，尤其係女士，服飾配搭得宜外，顏色仲要夠搶眼，好似議員陳曼琪（Maggie）就着咗件中國紅旗袍，仲搵埋「官場新貴」，律政司副司長張國鈞嚟合照添！另一邊廂，議員陳家珮都周圍搵現任同卸任官員合照，但佢嘅衣着顏色同現場環境高度「融合」，就好似「掩護色」咁，幾乎睇佢唔到呀！

陳曼琪着逾20年前旗袍

因應連串嘅活動，Maggie喺3日之內準備咗4件旗袍。而4件旗袍當中，就有一件係廿多年前，搵上海師傅度身訂造嘅，亦都係Maggie人生當中第一件旗袍，一直都珍而重之，平時好少着，而喺前日，即係國家主席習近平訪港首天，佢就着番呢件旗袍出席活動。至於尋日身穿嘅中國紅旗袍，就係近年添置嘅現成旗袍。佢話為咗彰顯文化自信同國民身份認同，着旗袍實在合適不過。

紅色係喜慶嘅顏色，議員容海恩、陳家珮同Maggie不約而同都揀咗紅色衣着，但佢哋嘅「紅色」深淺同鮮明度都唔同。其中容海恩所着嘅暗紅色連身裙，同好多人嘅衣着顏色都好「夾」，佢仲同「好姊妹」、轉咗跑道做民政及青年事務局局長麥美娟一齊合照添！麥美娟一身白色套裝，一紅一白，毫無違和感。至於陳家珮嘅連身裙，雖同樣係紅色，但就同升旗禮場地嘅地氈及座椅嘅紅色高度接近，喺「撞色」嘅情況下，直情黐晒地啊。

利敏貞反「傳統」打扮平實

講起「搶鏡」，相信大家都諗起衣着相當前衞嘅商務及經濟發展局常任秘書長利敏貞，官場當中可謂數一數二。但尋日利敏貞身穿黑衫加一件白色喱士外套，平實打扮實在令人大感意外，但咁都無礙佢成為「集郵」嘅對象。而近來好少喺公眾場合出現嘅政務司前司長張建宗，尋日就畀香港餐飲聯業協會會長黃家和「捕獲」，咁難得梗係影番張相啦！