政情：張國鈞立會拍片 帶網民遊景點

Horace先介紹自己嘅議員辦公室。佢大讚辦公室景色開揚，環境相當唔錯，係屋企以外，每日都會身處嘅地方。屬虎嘅Horace不但喺辦公室內掛上老虎圖畫，仲設有一個大書架收藏佢喜愛嘅書籍。Horace形容辦公室係「迷你圖書館」，事關佢落去議事堂辯論之前，往往喺芸芸嘅藏書中搵論據同靈感。跟住佢就將鏡頭移到立法會5樓平台花園，指該處可以盡覽行政、立法、司法機關，仲係睇煙花最靚嘅地方之一。

去到另一個Horace政治生涯中重要嘅地方，就係立法會議事廳。佢有感而發咁話，議事廳佔據佢大部分時間，期間見證5年動盪、吵吵鬧鬧嘅時刻。佢仲提醒其他議員，議事廳周圍都有好多鏡頭，議員喺度玩手機、上網甚至睇雜誌，都會無所遁形。喺立法會綜合大樓遊花園之後，佢都話希望日後可以另一個身份，再返嚟議事廳為香港服務。