政情：閉環嬉戲梁熙笑人肥 容海恩舊相即飛

喺Live初段，佢哋都講吓灣仔附近封路嘅情況，講講吓，梁熙就拎咗個證出嚟，而Eunice亦騷埋自己個證，梁熙笑住話：「點解你幅相咁肥嘅？」Eunice即刻反駁：「睇真啲，咪就係選舉嗰時咁嘅樣。」梁唔理佢講乜，仲話「你要影過輯嘞」，Eunice語帶抗議咁話「邊度肥呀？啱啱個CAM側邊位，影像拉闊咗啫！」見到佢咁嘅解釋，梁惟有話「多謝！多謝！」

雖然被嘲張相肥，Eunice全程都係笑住反駁嘅，但唔代表佢唔當一回事。事關佢嘅Fb Icon本來就係用緊之前選舉嗰張相，即係畀梁熙話肥嗰張證件相，而喺Live結束後，佢就換咗嘞！睇嚟唔介意係假嘅。

話聲一落，改另一個話題，咁多時間做乜好？梁熙就話每日都要做運動嘅，所以就準備咗橡筋帶，睇完文件就做吓運動。咁Eunice又帶咗乜？佢懶神秘咁攞咗包焦糖味零食出嚟，仲話大會都有準備薯片同花生，雪櫃仲有兩支汽水添呀！反而梁好似如夢初醒咁，話「係咩？係咩？」仲話一陣打開雪櫃睇吓先。

之後，佢哋就提及香港嘅創科發展，話香港要搞創科園，咁政府就要吸引人才，亦要制訂啲政策方向，例如將創科成果商品化同成品化，咁先吸引到國際投資等等。Eunice重提政府想做多啲生命科技嘅嘢，又話有款維他命可以令腦部維持活躍，佢見到有人食咗Keep得幾好喎。喺呢個時候，梁熙又笑住搶白，話「你食咗（維他命）所以你先Keep咁好，咁精神」，Eunice即刻否認。

跟住梁就話乜嘢藥係一定會發達？答案就係生頭髮嘅藥，因為男人最痛係甩頭髮。唔知係咪連番被嘲，Eunice反問「你係咪食（藥）咗先有咁嘅效果？」梁就話「我覺得我食咗仲多啲呀！」Eunice就建議佢要介紹食邊款藥，梁即刻封口，話呢啲係秘密嚟，唔可以話畀人聽。