政情：護士論辣㷫業界 何栢良頭都大埋

何栢良尋日喺電台節目度強調，佢當日、今日同將來都無意將護士專業同政府表現，拉上因果關係。佢咁講又唔似要跪低認衰仔，話當日言論唔清晰先會引起爭議，決定收番涉及言論，「希望可以聚焦番社會點樣可以復常，同埋畀意見幫到市民。」佢呢番言論幫唔幫到市民就唔知啦，但護理界睇嚟就唔收貨。護協主席源志敏就喺同一節目直接同何栢良講，香港即使有言論自由，人人都可以批評公職人員是否稱職，但唔能夠單以一個人嘅「出身背景」就下定論。源形容何嘅言論傷害咗成個香港護理界，「佢個邏輯等於話局長係一個女士所以做得唔好一樣。」香港護理專科學院院長車錫英之前都形容何嘅言論係挑撥離間，不忿咁話「護士喺對抗疫情上盡心盡力，依家應該同心抗疫，而唔係分化。」

睇番何栢良嘅惹火言論，係佢日前喺電台節目評價政府喺面對疫情嘅表現時，就明言陳肇始過去係護士，強調世界各地都係以專業層面做主帥，基本上都係醫生領軍；如果係由護士領軍，掌握疫情嘅資訊，同埋指揮過程上，容易出現過去幾年，市民大眾、某啲評論經常見到嘅字眼，如「慢」、「唔到位」或者「有疏漏」等。何栢良又指當局並冇把握時間準備好應對工作，令到香港傷亡慘重！認為要現屆政府喺換屆之前向市民道歉，甚至要設立紀念碑。

唔少人都覺得何嘅講法相當礙耳，前日（27日）就有22個護理專業團體發聲明，話唔滿意何嘅言論，直接鬧佢「匪夷所思」、「鹵莽判斷」，刻意踐踏護士嘅專業能力，製造醫護團隊嘅互相猜忌，挑起同煽惑市民對成個醫療團隊嘅反感情緒，令人齒冷咁話，仲揚言會聯署要求何栢良向護理界及市民大眾道歉！