政情：盧偉國 閉環前幫襯茶餐廳 「平凡食物更顯功架」

當日WK喺茶餐廳食咗炒蛋多士、五香肉丁麵同埋飲咗杯「茶走」。佢話炒蛋看似人人都會做，但要口感滑溜，就各有招數，有啲人會加鮮奶炒，入口就會嫩滑啲；而烘多士就要求火候拿捏得恰到好處，先至可以脆而不硬。雖然五香肉丁麵只係即食麵加罐頭，但要麵身唔會太軟或太硬，時間嘅掌握亦要剛剛好。至於杯奶茶，佢就話唔同嘅茶餐廳都各自有其茶葉嘅調配比例，加上「拉茶」嘅技巧，一般人好難複製其沁入心脾嘅絲滑感受，所以要歎好味嘅奶茶，始終都要去茶餐廳。

佢又話唔單止指定嘅餐單組合，食客即使提出一啲額外要求，茶餐廳都會盡量滿足，好符合港人靈活變通嘅特質，而呢一點，亦都係佢鍾意幫襯茶餐廳嘅一個原因。