政情：江玉歡：康文署招數似化妝 鎮唔住炒場黨

Doreen尋日喺社交平台貼文話20幾年前學過打羽毛球，但近幾年就打少咗，但阿仔叫到，佢都會落場搓吓波。期間亦見到康文署外判職員喺中段時間查身份證，佢覺得應該係仲有人炒場嘞！仲話依家炒場黨惟有陪坐，見招拆招，賺多一筆，但問題冇解決過。佢批評政府點解永遠唔能夠根治問題，亦唔係全心投入去解決，只係做一半或表面化吓妝，反問又點可以鎮得住班炒場黨呢？

歸根究柢，都係來自供求問題。Doreen反問政府有冇諗過開放學校運動場畀公眾使用，增加場地供應？事關大部分學校都係公帑興建，點解星期六、日、假期同暑假唔開放畀公眾，令公共資源得以善用？佢認為政府要諗吓喺疫情過後，開放學校運動場畀公眾使用，紓緩場地嚴重不足嘅問題。