政情：議員走入熱廚房 孖頭地辦出路廣

梁熙同張國鈞兩人喺漁灣邨嘅聯合辦事處喺今個月11日都正式啟用，佢哋本屬同一政黨，但張日前指為方便工作，先退任該黨副主席，過兩日仲索性退埋黨。而梁熙接受我哋查詢時話會將地辦上有關張國鈞嘅名遮住，而議員可租用辦事處總面積亦都無超過上限，佢又話自己半年前已經開始喺地辦工作，影響都唔大，團隊亦都好有經驗。話咁快，佢尋日就將「另一半」、張國鈞遮住咗嘞，仲話間接促成咗佢首個以梁熙個人名義設立嘅地辦喎。

至於麥美娟同陳振英喺6月初，正式宣布位於青衣長安邨嘅聯合辦事處啟用，當時仲為長者贈送愛心飯、水果同口罩等物資。陳振英就同我哋講，由於麥美娟當時以工會名義簽約，所以其黨友、新界西南議員陳穎欣會幫手接替，到時只要去房署重新簽番個名就可以轉讓。

陳振英亦指相信影響不大，如街坊有任何求助或查詢，都歡迎繼續搵佢哋幫手。據了解，陳穎欣仲會接手埋另外5個原屬麥美娟嘅地辦。

其實，陳穎欣喺早幾日已經講過，話佢同麥美娟其中一個地辦已開張，但就未有時間搞開幕禮，依家麥美娟已辭咗議員職務，佢話遲啲揀好開幕日子，就會搵番麥美娟嚟開幕禮剪綵添！

之不過，有聲音指嚟緊仲有議員加入政府，擔任副局長或政治助理等職位，相信退出地辦潮仍未完結呢！至於選委會界別前議員、候任創新科技及工業局局長孫東，以及選委會界別前議員、候任審計署署長林智遠，兩人就無開到地辦，就無除名嘅「煩惱」喇！