政情：議會乍現4席空缺 各黨磨拳戰補選

4名議員加入政府管治團隊，包括民建聯副主席張國鈞出任律政司副司長、工聯會副會長麥美娟出任民政及青年事務局局長、學者出身嘅孫東出任創新科技及工業局局長及會計界嘅林智遠出任審計署署長。議會出現空缺，意味要進行補選，即近1,500名選委會委員稍後需再投票。

政圈最近有傳，與張國鈞同一政黨嘅徐英偉係其中一個人選，因為論資歷同經驗，徐係首選。但又有指該黨曾參與選委會界別嘅陳凱榮亦有可能捲土重來，當時佢以29票之差無緣進入議會，而佢亦曾喺2020年立法會選舉中排張國鈞競選名單第二位。

麥美娟辭任議員，咁工聯會會派邊個出選？有指係曾參選選委會界別落敗、現職巴士車長嘅蔡永強，佢喺巴士行業工作超過10年。此外，喺上次港島東直選落敗嘅新民黨廖添誠同樣有機會參與補選，亦有指喺選委會界別「意外」落敗嘅全國港澳研究會理事黃梓謙亦有機會再參選。

不過，有政界中人話最終人選仍未有定案，要待新一屆政府定下來，笑言可能最終需要補選嘅席位不止4個，或有更多議員離開議會加入政府團隊都唔定，所以睇定啲。

隨着4名議員離開，原本喺立法會嘅職務亦有變動。由於上屆修訂咗議事規則，議員加入委員會或草案委員會都用名單制，分配配額，其中以孫東為首嘅名單就轉咗畀陳紹雄，原本以麥美娟為首嘅名單就改為吳秋北。同時亦有兩個議員「埋堆」，教育界朱國強同選委界林順潮都加入咗陳紹雄嘅名單，由於孫東同林智遠辭職，兩出兩入，名單維持14人。至於吳秋北名單就減少一人至9人，由於張國鈞將會出任律政司副司長，所以原先佢喺陳克勤嘅名單，就由19人減至18人。