政情：不忍三無廈慘況楊永杰組隊幫忙

九龍區嘅舊樓眾多，而且多數都喺60年代興建，部分亦都屬於無業主立案法團、無任何居民組織同無管理公司嘅「三無」大廈。但政府就對此好似視而不見，亦都零支援，搞到大廈淪為病毒溫床同有消防隱患，加上防治蟲鼠工作亦未見成效，令該類大廈不時有老鼠出沒，形成防疫缺口，居民生活水深火熱。而負責協助大廈業主成立法團嘅民政事務總署，都曾經被審計報告點名批評推行計劃過慢，令到居民都唔知搵邊個幫好。

既然政府幫唔到手，有人就諗計幫拖。好似立法會議員兼九龍城區議員楊永杰同佢所屬嘅社團聯會見到「三無」大廈嘅慘況，對呢個問題好關注，而九龍中756幢「三無」大廈當中，多達702幢就位於九龍城區。因此佢哋就提出以慈善團體嘅形式，搵義工落區幫助「三無」大廈嘅居民，包括協助清理垃圾、安裝閉路電視等，增加社區對佢哋嘅關注喎，仲形容呢個係嶄新嘅概念。

楊永杰亦都批評政府對呢類大廈無支援同管理，雖然過往已經討論咗好多次，但依然有好多缺失，似乎無進步過，例如陌生人都可以自出自入，而由於有啲大廈無人做清潔，令到衞生出現好大問題，隨時令疫情再次大爆發。

炮轟政府零支援

再加上最近雖然俗稱「劏房租務管制」已經生效，但佢就批評租戶同業主之間依然爭拗不斷，因為好多業主未有出示水電帳單，隨時出現濫收水電費等嘅情況，而劏房戶對租管條例亦認知不足，令到部分居住喺「三無」大廈嘅居民求助無門。

所以，佢都希望為呢班「三無」大廈嘅居民帶來幫助，包括幫佢哋睇吓租約、調解服務、為基層學生提供補習服務、工作配對，甚至喺剩食回收等。

另外，佢日後都會喺區議會同立法會上提出跟進相關議題，包括議員議案或者口頭質詢，要求政府增撥資源協助，包括處理維修同火警等問題。