昔日東方政情：1823打極唔通 查詢投訴似黑洞
議員倡安排足夠人手 應付市民需求
政府早年推出「1823政府一線通」，方便市民可以透過一個熱線電話，就可以向多個指定政府部門查詢服務同處理投訴。不過疫情之下，好多投訴話1823打極無人聽，被外界鬧爆。日前創新及科技局回覆議員陸頌雄書面質詢時就承認，喺今年3至5月被系統掛斷電話嘅數字達63%，但又指來電平均等候時間僅75秒。陸直言當局數據編排「有技巧」，與市民體驗不符，又認為當局要有前瞻性，盡快做好部署，應對第6波疫情爆發。
陸頌雄指出，根據有關文件顯示，喺今年3至5月被系統掛斷電話數字有63%，加上自行掛斷7%，高達七成人無法打通1823，就連去年12月至今年4月，亦有五成人無法打通電話，證明1823確實無法應付電話流量。
質疑靠自動掛斷造數
不過，陸早前曾批評致電1823等咗10幾分鐘仍然「線路繁忙」，熱線最後更自動掛斷。局方卻回覆指，今年3至5月來電平均等候時間僅75秒，去年12月至本年2月則需等79秒。數據似乎有一定出入，陸笑言，可能掛斷熱線唔使人等，造靚條數。陸又指3月為疫情高峰，至4月5月呈下降趨勢，求助人數相應減少，當局有技巧地以3至5月此時間段劃分，拉上補下，導致數據有出入，事實上未能真確反映市民打極無人聽嘅體驗。
面對近日確診人數上升，或爆發第6波疫情，陸認為當局要做好部署。佢建議當局必須安排足夠人手，甚或可以安排一批人在家中作接線生，或招攬家庭主婦等兼職幫忙；又或者將來有政府部門因新一波疫情爆發而暫停服務，相關嘅公務員亦可以投入服務，解決1823打極無人聽嘅情況。佢又提到，除疫情外，其實每當牽涉全港市民嘅服務，譬如派發消費券，同樣極需增加1823嘅人手。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
