政情：專注教學提升 龐愛蘭撐院校唔玩排名

無可否認，國際排名位居前列嘅大學，都係令人稱羨嘅一流學府，但龐愛蘭認為學生將來嘅成就，同佢就讀院校所取得嘅國際排名，並無太大關係。然而就係有院校太過着眼於排名，刻意迎合一啲評分指標，例如博士學位同學士學位嘅比例、論文發表數量、出版書籍同舉行學術會議等等，其落力程度隨時多過對學生嘅關懷，咁做豈不是捨本逐末？

正所謂有麝自然香，佢認為院校只要做好授業解惑嘅本分，自然有其江湖地位，畢竟院校排名只屬參考性質，無謂畀人家制訂嘅評分準則牽住鼻子走喇！之但係，佢又認為學生值得到外國大學「浸鹹水」，理由唔係院校嘅名氣，而係接觸來自五湖四海嘅同學，體驗唔同嘅文化，擴闊人脈同視野。