政情：海洋公園神仙難救 龐建貽風雨中接手

龐建貽喺2019年先至加入海洋公園董事局，政府話佢擁有豐富嘅商界經驗，對推展未來策略有深入理解，一直充分投入董事局嘅工作咁話。睇番海洋公園上一個年度虧損3,180萬元嘅業績，喺疫情未知幾時見盡頭嘅情況下，經營狀況難以樂觀，況且舊年開幕嘅水上樂園，入場人次不似預期，早前需以門票半價嘅招數吸客，可見海洋公園要長期扭轉虧蝕局面，真係唔容易。

雖然風雨飄搖，但龐建貽都唔係孤身一人嘅，因為除咗佢之外，政府亦同時委任黃思遠出任副主席，以及有8名新任成員加入，同埋再度委任7名現任成員，眾人嘅任期都係兩年。新獲委任嘅非官守成員為周明祖、李少穎、梁進、馬昀祺、蕭澤宇、Gray A Williams和黃顯榮，而漁農自然護理署署長新獲委任為官守成員。獲再度委任嘅現任成員為張瑞蓮、馮秀炎、林天星、潘芷慇、胡陳德姿、發展局常任秘書長（工務）同旅遊事務專員。