政情：林鄭又疑講粗口 有片為證「好足鳩」

話說肆虐本港將近半年，第5波疫情不但未見消退，近日更有反彈迹象，單日確診數字重回過千大關。林鄭喺疫情記者會上侃侃而談，呼籲市民減少跨家庭聚會，除口罩飲食要小心。當佢回應有關重啟社區暫託中心同隔離設施嘅提問，就指目前社區隔離設施嘅供應係「好足夠」，音調突然改變，將「夠」嘅粵音gau3，唸成「鳩」gau1，在場記者都為之側目呀！

其實林鄭「疑似爆粗」已經唔係第一次。喺今年2月4日嘅疫情記者會，佢公布政府進一步收緊防疫措施時就「出事」，其「爆粗」嘅片段於網絡廣為流傳，可清晰咁聽到佢講「除咗供應……啊吾係，×……除咗提供緊急同必須嘅抗疫支援服務外，公務員都係在家工作。」到底係林鄭「口誤」，還是特首嘅工作太過壓抑，言談間唔覺意流露真性情呢？咁就要佢本人至知啦。

林鄭尋日喺記者會又提到，鑑於本地個案同輸入個案都有所上升，且當中涉及群組傳播，因此呼籲巿民減少非必要嘅飲宴接觸。林鄭又話自己已出席立法會最後一次答問大會及完成最後一次議會發言，「無咩特別嘢想同議員講」，然而主席梁君彥好客氣，話想下個禮拜請佢食餐飯，但林鄭強調自己會以身作則，即使任期將近結束，近日有唔少餞別、歡送嘅宴會，如立法會餞別宴會、首長級宴會、行會宴會、司局長宴會等，所有飲宴統統都取消。

至於七一酒會是否同樣取消，林鄭回應時表示，過去兩年因應防疫要求已不設酒會，僅於升旗禮觀禮後設有其他環節，有關宴席嘅活動已全數取消。