昔日東方政情：特首離任租辦公室 政府被指嘥公帑
仲有不足半個月，特首林鄭月娥就會結束其42載嘅公務生涯，外界預料佢將一如歷屆特首，卸任後獲政府提供「前任行政長官辦公室」，而當局亦準備在金鐘甲級商廈物色單位，以支援林鄭日後接受訪問，或接見訪港政要等禮節性活動。之不過，林鄭兩個仔都唔喺香港居住，夫婿嘅自住物業亦唔喺香港，而佢又想花幾年時間到處遊覽喎，咁仲有冇必要花公帑租個辦公室呢？
位處金鐘甲級商廈
其實政府向來都係以中環半山堅尼地道28號，為「前任行政長官辦公室」嘅地點。然而該處只能容納3位前任特首使用，因此政府正準備喺金鐘太古廣場，為林鄭離任後設辦公室。行政署解釋，第4位前任行政長官辦公室嘅安排，係考慮到現時並無其他合適嘅政府處所，及前任行政長官辦公室嘅運作需要，包括位置、交通、便利會見各界人士及保安等因素。自稱無意喺香港置業嘅林鄭日前講過，佢兩個仔唔喺香港居住，而老公林兆波就喺內地就有一個自住物業，加上佢對於出外旅遊充滿期望，話如非檢疫問題，可以花幾年時間到處遊覽。下月林鄭遷離禮賓府之後，究竟有幾多機會用到呢個辦公室呢？恐怕屈指可數啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
