政情：隧道塞車繳費之過陳帆死撐：容量超負荷

作為將軍澳路面交通主要幹道之一嘅將軍澳隧道，繁忙時段經常出現塞車情況。議員李世榮認為，若非停車繳付「3蚊雞」嘅隧道費，將軍澳隧道嘅擠塞未必會咁嚴重。不過運輸及房屋局局長陳帆就反駁話，停車繳費並非塞車主因，而就算豁免將軍澳隧道收費，都要待將藍隧道開通之後。

將藍隧開通有望慳三蚊

陳帆引用2021年嘅交通數據，指早上及傍晚將軍澳隧道容量會超出四至五成，形成繁忙時段嘅交通擠塞。佢認為待將藍隧道開通後先至豁免將軍澳隧道收費，屬於較為穩妥嘅做法。佢又話，運輸署正研究優化附近巴士交通網絡，將會設立新路線由大埔工業邨到將軍澳，將適時諮詢區議會，並會審視地區人士意見。然而李世榮不滿回應，指將軍澳隧道費只係「3蚊雞」，批陳帆諸多藉口。

議員林素蔚就指將軍澳隧道早、午、晚都擠塞，敦促政府承諾將軍澳跨灣連接路及將藍隧道如期通車，否則應向居民作出補償。陳帆話收費從來都唔係政府嘅考慮，舉例話亦有豁免青馬大橋收費，重申將軍澳隧道之後都會豁免收費。佢話有信心今年內將軍澳跨灣連接路同將藍隧道會如期通車，同時鼓勵市民乘搭公共交通工具出行。