政情：葉劉溫提朱國強唔肯制

就有關提升薪酬嘅建議，教育局副局長蔡若蓮喺會上形容今次項目乃業界翹首以待，指隨着社會發展以及教育工作嘅複雜性，認為有需要增加人手同理順薪酬。郭玲麗話當局早年已承諾小學由半日制轉為全日制後，會改善薪酬架構，但拖延咗多年都未履行；又話現行安排下，小學欠缺中層人手，即使學校希望安排主任負責國民教育，亦無法做到。而朱國強就話，部分人可能不滿教師喺反修例風波嘅表現，但佢強調絕大部分教師都係緊守崗位，呼籲其他議員同事支持項目，還教師尊嚴同公道。

雖然朱國強呼籲議員同事支持，但委會員主席葉劉淑儀就促請議員避嫌，勸朱國強同郭玲麗唔好投票，強調今次議程料可通過，事關「教育局幫你拉晒票」。不過朱國強唔同意葉劉嘅講法，話今次項目涉及全港政策，即使投票亦唔算違規，朱又承諾會向教育慈善機構捐出薪酬增加嘅部分。葉劉見朱堅持投票，就話「要投都尊重你」。但最終因項目未完成討論，就未進行投票喇。

其實喺上個月嘅教育事務委員會，朱國強就因為投票贊成公營小學校長薪酬調整而遭到質疑，指佢唔可以就有關金錢利益嘅任何議題表決。不過佢話表決前曾問過秘書處，對方只係話須申報利益，冇話唔可以投票，況且議題並非只涉其個人利益，而係關乎全港校長待遇，加上佢身為業界代表，投贊成票好合理咁話。