昔日東方政情：環境局連開多位政府跪低
立法會人事編制小組委員會上周五（10日）討論環境局同環保署內部重組嘅申請，理由係下屆政府環境局將改組為「環境及生態局」，需加開7個首長級職位以應付職能擴張，但議員陳克勤質疑偷步開位，直斥係「不君子行為」並離場抗議。事隔4日，政府尋日去信小組委員會撤回申請，話政府須更多時間考慮議員意見。對於政府嘅做法，陳克勤話反映尊重立法會監察嘅職能。
話說政府去信小組主席葉劉淑儀，話上周五嘅會議上，議員對落實重組提出唔同意見，政府需要更多時間研究，因此決定撤回項目。
對於政府跪低，陳克勤接受傳媒查詢時話係合適做法，咁做至少令人覺得尊重立法會嘅監察職能。佢認為政府即使面對有爭議議題或需要增加人手資源，都不能夠完全唔跟程序，或耍政治小聰明，而事件對於政策局日後處理唔同問題係好嘅學習例子。
陳克勤：程序處事方法不恰當
環境局局長黃錦星當日話開位涉及政府架構重組，係一個比較特殊嘅情況，希望議員能夠特殊處理；又話希望新一屆政府嘅人事班子可以早啲就位，令到新嘅政府開局更加好。但陳克勤就批評開位申請程序同處事方法都唔恰當，咁做無論對議會同對佢個人都有欠尊重，之後更離場抗議。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
