政情：愛打乒乓球 梁栢賢晒波枱搵對手

PY喺4月11日話唔再撰文論述疫情後，期間都只係出過一篇貼文，係講自己歎美食嘅，而尋日嗰篇呢？大家放心，同疫情無關，而係講波嘅。眾所周知，PY係「球王」，好鍾意揮拍類嘅運動，精於網球、壁球同羽毛球，最新嘅愛好係乒乓波，愛到乜嘢程度！等佢話你知，貼文寫住「當你愛上乒乓波之後，有機會遇上一張靚波枱，是何等興奮！」

雖然佢無透露呢張波枱嘅來歷，但有眼利嘅網友即刻留言：「這款是比賽級數的喔！」另有網友話：「凡戀上乒乓波嘅人，都感受到你的喜悅。我見到張枱，已經流晒口水。」PY亦讚網友有眼光，仲話自己已轉打橫板，學吓新方法，比直板好。唔少網友話要同佢切磋球技，其中前議員李華明亦話「幾時同我打呀！」睇嚟大家都期待同PY對戰喎。