政情：3建築列法定古蹟有議員𢱑頭嗌唔識

政府早前刊憲，根據《古物及古蹟條例》將位於中環些利街嘅回教清真禮拜總堂、香港大會堂、旺角荔枝角道嘅雷生春，列為法定古蹟。有議員尋日喺相關小組委員會會議上，批評當局諮詢緩慢，亦指每個時代對古蹟嘅理解都不同；亦有議員稱需注重整體發展，同時確保古蹟得以保存。

諮詢慢保育差配套百無

議員何俊賢認為每一代都有其集體回憶，但對古蹟嘅理解就有唔同，指「自己以前咁窮，大會堂都未去過」。佢同意大會堂被列入法定古蹟，係因為認同其歷史價值。但佢批評當局做法有問題，提交文件到立法會太慢，令議員難以理解，更指有議員唔清楚早前刊憲嘅建築，話「呢3件嘢係咩嚟」。稱在坐議員也難以講得出5個一級歷史建築嘅名字。議員林琳亦希望當局增加主動性，將諮詢程序提前。

自稱係「業餘音樂愛好者」嘅議員盧偉國，形容大會堂嘅音響猶如古董喇叭，令人驚嘆，但後台空間不足需改善。至於議員鄭泳舜亦指大會堂嘅保育，需注重配套及整體發展。另外鄭亦關注清真寺及雷生春等嘅導賞團工作，尤其是前者，可以令市民認識少數族裔嘅生活。

當局回應話，會注意古蹟周邊嘅配套發展，喺古蹟嘅維修方面亦會同各個政府部門全力配合，而現時香港有120個一級歷史建築，當局每年都會不時檢視，未來亦會透過不同科技，令到市民參與古蹟發展及提升保育意識。