政情：疫情反彈 梁君彥提醒議員自律

立法會近期再現疫蹤，不但有議員嘅職員「中招」，而特首林鄭月娥喺上周四到立法會出席任內最後一次答問大會，陳祖恒翌日確診，情況令人關注。據悉，立法會行政管理委員會尋日召開嘅會議上，亦有議員提及會否影響下周二為林鄭舉行嘅餞別午宴，因為到時將會有官員、行會成員同議員出席。秘書處回覆傳媒有關餞別宴會否如期舉行時，話會密切留意疫情發展，若有最新安排會通知議員同相關人士。

因應疫情回升，據悉，梁君彥尋日亦提醒全體議員加強防疫，應避免參與社交聚會，又叫議員避免「請食嘢」，如果要喺立法會前廳進食，之後應即時戴番口罩。秘書處亦已通知議員，每位議員或其職員可以領取100盒快測套裝，並促請佢哋每日返回大樓前做快測。