政情：海鮮舫將拖走 陳家珮爆曾有團體願打救

Judy先喺社交平台貼文話若果海鮮舫最終要離開，好大機會一去不返，重生機會亦更渺茫，所以佢希望政府能夠積極同有關方面了解情況，研究提供更充裕嘅時間，畀海鮮舫換取重生嘅空間，回應香港市民嘅期望。

跟住佢喺一個網上節目中更爆料，話自從5月底傳出海鮮舫要搬離後，短短10日內已收到唔少團體或個人希望可以幫忙，其中有團體話願意畀「誠意金」，希望政府暫時接收隻船，唔使被拖走，等佢哋做好計劃後，再由該團體所屬嘅非牟利團體接返嚟保育，就算最終唔成事，政府亦可將呢筆誠意金袋袋平安。

佢仲話由於施政報告中曾講過話要活化海鮮舫呢個歷史悠久嘅香港地標，自不然就有公眾期望，但依家留唔到亦做唔到嘅話，政府係欠公眾一個交代，必須講清楚喺過去一年半做過啲乜嘢？甚至要諗吓用乜嘢新科技，令市民可以繼續睇到呢個地標。