政情：元宇宙展覽 議員有讚無彈

已經設立「元宇宙議員辦公室」嘅議員吳傑莊話學生唔需要搭車，就睇到香港輝煌歷史，預計瀏覽人數係10幾萬，仲話今次多咗一個渠道，令市民留意番身邊一直被忽略嘅事情。本身對華南同香港歷史好有研究嘅議員劉智鵬都話今次好有新鮮感同意義，形容為異常地愉快。佢話過往整實體展覽會搞到「一頭煙」，因為要花時間搵場地整硬件，但依家虛擬展可以攤喺度整，仲話走出課室係未來新嘅教學方向。

同樣有份策劃嘅議員李鎮強話隨住時代變遷，自己都要加緊步伐，仲講到不論係「等緊人定食緊飯」，只要打開個網站，就可以睇到香港珍貴片段，同時展望未來。