政情：公僕加薪 傳留待新班子搞掂 工會促重新聽意見

薪酬趨勢調查結果早前出爐，低層同中層分別加薪2.04%、4.55%，高層加薪高達7.26%，高層嘅加幅遠超通脹惹起社會反彈。話說喺上周行會之後，有個別公務員團體出嚟再解畫，亦講到外界對公務員嘅睇法唔公道，甚至有公務員團體就早前喺立法會有關改革公務員制度嘅動議辯論中，有個別議員嘅言論不負責任、譁眾取寵同一竹篙打一船人，簡直令人心寒，並予以譴責，跟住又有議員為言論辯護，之後就無再聽到坊間再討論加薪事宜。

靜咗一個禮拜左右，政府人員協會尋日就去信當局提出相關嘅要求外，想藉此查詢政府處理公務員薪酬調整工作嘅進展，促請當局按機制、全盤考慮6大因素，加快處理，期望趕及政府換屆前完成有關程序，該會又話對薪酬調整若出現延遲感到無奈。馬志成話局方喺行會前諮詢各公務員團體嘅意見後，到依家都冇聲氣，姑勿論政府係咪因政治理由押後討論公務員加薪，但公務員團體嘅意見不容忽視，又話到時特首換咗人，局長可能又換人，即係老細全部換晒人，拍板加薪嘅行政會議成員又唔同嘅話，新一班子好應該聽吓公務員團體嘅意見㗎！等班工會代表直接反映意見都係好正常嘅事。

講到乜嘢政治原因而押後拍板？佢話唔想揣測，但過往泛民主派不停拉布，例如2019至2020年度加薪，泛民主派喺財務委員會拉布，拉到2020年2月底過咗農曆新年先過到撥款，真係累到好多非公務員合約僱員好慘。事關公務員加薪可追溯到每年嘅4月1日，若公務員加薪延期，非公務員合約僱員將因無法調薪而受到傷害，尤其係呢班員工都係基層嚟嘅，佢哋每年都睇住9月調薪去畀仔女嘅書簿費，依家立法會冇泛民玩拉布，最好喺9月前通過埋撥款，所以該會要求政府承諾為呢批受害員工設追溯期，照顧埋佢哋。